ត្បូងឃ្មុំ៖ កាលពីថ្ងៃទី២១ ខែមករា ឆ្នាំ២០២៥ វេលាម៉ោង២១៖៥៥នាទី នៅចំណុចភូមិ អន្លង់ជ្រៃឃុំកក់ ស្រុកពញាក្រែក ខេត្តត្បូងឃ្មុំ មានជនមិនស្គាល់ អត្តសញ្ញាណម្នាក់ ភេទប្រុស ជនជាតិខ្មែរ បានធ្វើសកម្មភាពយកខ្សែភ្លើងរិតកតៃកុងរថយន្ត និងវាយជនរងគ្រោះឈ្មោះ មាស មករា ភេទប្រុស អាយុ៣២ឆ្នាំ ជនជាតិខ្មែរ ជាអ្នករត់តាក់ស៊ី ដើម្បីប្លន់យករថយន្ត០១គ្រឿងម៉ាក TOYOTA PRUIS ពណ៍ខ្មៅ ពាក់ផ្លាកលេខ ភ្នំពេញ 2BH-1033 បានសម្រេច រួចយកទៅផ្លុងចោលនៅក្បែរទីតាំងកើតហេតុ (ដោយសារគ្មានសោរ) ហើយរត់គេចខ្លួនបាត់ស្រមោលតែម្តង។ដំណឹងនេះបានលេចឮដល់សមត្ថកិច្ចនិងហើយសមត្ថកិច្ចមិនបង្អង់យូរដោយ
ទទួលបានបទបញ្ជាពីលោកឧត្តមសេនីយ៍ទោ ចិន នី ស្នងការនគរបាលខេត្តត្បូងឃ្មុំ កម្លាំងជំនាញស្នងការដ្ឋាននគរបាលខេត្តត្បូងឃ្មុំ បានសុំកិច្ចសហការជាមួយនគរបាលនាយកដ្ឋាននគរបាលព្រហ្មទណ្ឌ ស្នងការដ្ឋាននគរបាលខេត្តព្រៃវែង ស្នងការដ្ឋាននគរបាលរាជធានីភ្នំពេញ ធ្វើការស្រាវជ្រាវតាមនីតិវិធីយ៉ាងយកចិត្តទុកដាក់ រហូតកំណត់អត្តសញ្ញាណ និងទីតាំងលាក់ខ្លួនរបស់ជនសង្ស័យខាងលើ។
លុះថ្ងៃទី២៤ ខែមករា ឆ្នាំ២០២៥ វេលាម៉ោង២៣៖១០នាទី កម្លាំងជំនាញបានបន្តដឹកនាំសហការ ដោយឃាត់ខ្លួនបានជនសង្ស័យខាងលើមានឈ្មោះ ស៊ុយ ដុល្លា ភេទប្រុស អាយុ២៨ឆ្នាំ ជនជាតិខ្មែរ ត្រង់ចំណុចមុខតំបន់សេដ្ឋកិច្ចពិសេសកំបូល ស្ថិតក្នុងសង្កាត់កំបូល ខណ្ឌកំបូល រាជធានីភ្នំពេញ។ បច្ចុប្បន្ន ជនសង្ស័យខាងលើត្រូវបាននាំខ្លួនមកកាន់ស្នងការដ្ឋាននគរបាលត្បូងឃ្មុំ ដើម្បីបន្តនីតិវិធី ចំពោះរថយន្តខាងលើ ស្នងការដ្ឋាននគរបាលខេត្តត្បូងឃ្មុំ បានប្រគល់ជូនជនរងគ្រោះយកទៅប្រើប្រាស់វិញ។ជនរងគ្រោះមានសេចក្តីត្រេកអរជាពុនពេកដែលសមត្ថកិច្ចបានដុតដៃដុតជើង ចាប់ជនសង្ស័យបាន ហើយបានផ្ដល់រថយន្តដល់ខ្លួនវិញរកអ្វីមកនិយាយប្រៀបផ្ទឹមពុំបាន។
Post a Comment