ដោយសារសម្តែងជាស្រី និងកូនក្មេងរឡិករឡក់តារាកំប្លែង ទីកូ ត្រូវកូនប្រុសប្រាប់ត្រង់ៗថាខ្មាសគេ និងសុំឱ្យឈប់សម្តែងបែបនេះ.

ជឿជាក់ថាអ្នកលេងហ្វេសប៊ុកប្រាកដជាបានស្គាល់តារាកំប្លែង នាយទីកូ ដែលតែងលេចមុខនៅក្នុងការសម្តែងកំប្លែងខ្លីៗមិនថានៅក្នុងក្រុម នាយព្រែក  និង ពូណុយ ។ អ្វីដែលកត់សម្គាល់ នាយទីកូ សម្តែងបានយ៉ាងស័ក្តិសមជាតួស្រី តួយាយ និងតួកូនក្មេងដែលមានចរិកបែបរឡិករឡក់ ជាដើម។ ដោយសារតែការសម្តែងរបស់ នាយបែបនេះហើយទើបធ្វើឱ្យកូនប្រុសរបស់នាយខ្មាស់គេនឹងថែមទាំងសុំឱ្យនាយឈប់សម្តែងជាតួបែបនេះទៀត។

គួរឱ្យដឹងថាបើទោះទើបលេចមុខប៉ុន្មានឆ្នាំចុងក្រោយនេះក្តី តែ នាយ ទីកូ  ត្រូវបានអ្នកគាំទ្រជាច្រើនទទួលស្គាល់នាយមានសមត្ថភាពសម្តែងបានយ៉ាងល្អ ជាពិសេសសម្តែងជាតួភេទទីបី និងតួកូនក្មេងបែបមិនសូវគ្រប់  ។

អ្នកលេងហ្វេសប៊ុកជាច្រើនបានហៅ នាយ ទីកូ ថា ចែសាមាន្យ ដែលល្បីនៅក្នុងរឿងកំប្លែងខ្លីៗរបស់ក្រុមកំប្លែង ពូណុយ។ បើទោះចូលចិត្តសម្តែងជាតួស្រីបានយ៉ាងល្អក្តី តែ នាយទីកូ ប្រាប់ថាខ្លួនជាមនុស្សប្រុសពិតប្រាកដហើយនាយក៏មានភរិយានិងមានកូនពីរនាក់ដែលកូនប្រុសច្បងមានអាយុ១៧ឆ្នាំ និងកូនទីពីររៀនថ្នាក់ទី ៥ ទៅហើយ ។ ដោយសារនាយសម្តែងជាតួ បែបនេះទើបកូនប្រុសប្រាប់ថា ខ្មាស់គេហើយថ្មីៗនេះថែមទាំង មិនហ៊ានឱ្យនាយទៅជួបគ្រូប្រចាំថ្នាក់ពេលមានការជួបជុំអាណាព្យាបាលសិស្សទៀតផង ។ កូនច្បងរបស់ នាយទីកូ  តែងប្រាប់ឱ្យនាយឈប់សម្តែងជាស្រី និងក្មេងរឡិករឡក់ព្រោះខ្មាស់គេ ហើយសម្រាប់នាយក៏បានទទួលស្គាល់ថាបើសម្តែងនៅមុខប្រពន្ធ និងកូនៗក៏មានអារម្មណ៍ថាខ្មាស់ដែរ ។

មិនមែនជារឿងចៃដន្យទេមុននឹងមានឈ្មោះបោះសំឡេងដូចសព្វថ្ងៃនេះ នាយទីកូ ឬ ចែសាមាន្យ ក៏ធ្លាប់ចូលរួមនៅក្នុងកម្មវិធីប្រឡងកំប្លែងរបស់ស្ថានីយទូរទស្សន៍មួយនៅក្នុងចំណោមមនុស្សរាប់ពាន់នាក់ ដែលកាលណោះនាយជាប់ក្នុងចំណោម ១៥នាក់ តែមិនបានជាប់នៅក្នុងចំណោម ៧នាក់ឡើយ ដែលកាលណោះគេប្រាប់ថានឹងហៅទាំង ១៥នាក់លេងកំប្លែង តែមិនដឹងរឿងអ្វី នាយបែរជាមិនមានឈ្មោះនៅក្នុងក្រុមកំប្លែងរបស់ទូរទស្សន៍នោះដែលធ្វើឱ្យនាយមានការអាក់អន់ចិត្ត ពេលខ្លះថែមទាំងយំនៅពេលឃើញក្រុមនោះសម្តែងនៅក្នុងទូរទស្សន៍ ។

ប៉ុន្តែពេលនេះនាយ ទីកូ ក៏មានឱកាសបានសម្រេចក្តីស្រមៃដោយបានចូលរួមលេងរឿងកំប្លែងខ្លីៗ ជាមួយក្រុម ពូណុយ នាយព្រែក និងក្រុមផ្សេងៗទៀតជាច្រើន ។ ក្រៅពីលេងកំប្លែង នាយទីកូ ក៏ជាអ្នកច្រៀងកាត់សក់ម្នាក់ដែរ។ ក្រោយពីទីផ្សារកំប្លែងទូលាយជាងមុន នាយទីកូ ទទួលស្គាល់ថាជីវភាពប្រសើរជាងមុន ៕