បុរសម្នាក់សុំទោស ក្រោយពីផ្សាយផ្ទាល់និយាយមិនពិតថា ម្សិលមិញភ្លៀងធ្លាក់ខ្លាំង មនុស្ស១២នាក់ និងម៉ូតូ១២គ្រឿង ហូរបាត់ទៅតាមលូ
ភ្នំពេញ ៖ បុរសម្នាក់ នៅថ្ងៃទី០៩ ខែសីហា ឆ្នាំ២០២៤នេះ ចូលខ្លួនមកសុំទោសចំពោះមុខអាជ្ញាធរខណ្ឌដូនពេញ បន្ទាប់ពីធ្វើការផ្សព្វផ្សាយព័ត៌មានមិនពិតតាមបណ្តាញសង្គមហ្វេសប៊ុក ដែលមានខ្លឹមសារថា នៅម្តុំផ្សារកណ្តាល មានទឹកលិចជាខ្លាំង បណ្តាលឲ្យបាត់ម៉ូតូ និងមនុស្សចំនួន១២នាក់ ទៅតាមលូ កាលពីវេលាម៉ោង២០និង៣០នាទីយប់ថ្ងៃទី០៨ ខែសីហា ឆ្នាំ ២០២៤ ។
ក្រោយពីបានឃើញការផ្សព្វផ្សាយព័ត៌មានរួច កម្លាំងប៉ុស្តិ៍នគរបាលរដ្ឋបាលផ្សារកណ្តាលទី១ នៃអធិការដ្ឋាននគរបាលខណ្ឌដូនពេញ សហការជាមួយគណៈបញ្ជាការឯកភាពខណ្ឌ-សង្កាត់ដូនពេញ បានធ្វើការកោះហៅបុរសខាងលើ ដែលមានឈ្មោះ ពឹម ចាន់ ជាម្ចាស់ហ្វេសប៊ុកឈ្មោះ ចាន់ វឌ្ឍនាការ មកធ្វើការបំភ្លឺករណីនេះ ។
បន្ទាប់ពីសមត្ថកិច្ចជំនាញសួរនាំរួច បុរសខាងលើបានប្រាប់សមត្ថកិច្ចថា ការឡាយវីដេអូរបស់គាត់ ដែលមានខ្លឹមសារថា នៅម្តុំផ្សារកណ្តាល មានទឹកលិច ជាខ្លាំងបណ្តាលបាត់ម៉ូតូ និងមនុស្សចំនួន១២នាក់ ទៅតាមលូ គឺគាត់គ្រាន់តែនិយាយលេងប៉ុណ្ណោះ ហើយគាត់យល់ព្រមទទួលស្គាល់ នូវកំហុសឆ្លងរបស់គាត់ ហើយសមត្ថកិច្ចបានធ្វើការអប់រំណែនាំ និងធ្វើកិច្ចសន្យាបញ្ឈប់សកម្មភាព ដែលធ្វើប៉ះពាល់ដល់សង្គម និងឲ្យគាត់សុំទោសជាសាធារណៈ ចំពោះកំហុសឆ្គងនេះ ៕
Post a Comment