ស្រីស្អាតវ័យ១៧ឆ្នាំ ឆបោកពីជនរងគ្រោះមនុស្សចាស់ៗ ០៩នាក់ បានគ្រឿងអលង្កា ជិត០៤តំឡឹងមាស..

អាវុធហត្ថបញ្ជូនខ្លួនថៅ JASSMINE KTV ទៅសាលាដំបូងខេត្តបន្ទាយមានជ័យអនុវត្តតាមនីតិវិធី ពាក់ព័ន្ធករប៉ុនប៉ងមនុស្សឃាតទៅលើដៃគូជំនួញរបស់ខ្លួន

ភ្នំពេញ ៖ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង ចុះឃាត់ខ្លួនជនសង្ស័យម្នាក់ឈ្មោះ គួយ ថាវី ភេទប្រុស អាយុ៣៩ឆ្នាំ ជនជាតិខ្មែរ បច្ចុប្បន្ននៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ពាក់ព័ន្ធករណីហិង្សាដោយចេតនា ដែលប្រព្រឹត្តកាលពីវេលាម៉ោង០១និង០០នាទី ថ្ងៃទី២៨ ខែកុម្ភៈ ឆ្នាំ២០២៤ នៅចំណុចខារ៉ាអូខេ JASSMINE (អតីត Touch Down) ស្ថិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។ ករណីនេះធ្វើឡើងតាមពាក្យបណ្តឹងរបស់ជនរងគ្រោះឈ្មោះ ស្រ៊ន ស៊ីវហេង ភេទប្រុស អាយុ២៨ឆ្នាំ ជនជាតិខ្មែរ បច្ចុប្បន្នរស់នៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។

លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងបានឱ្យដឹងថា ជនរងគ្រោះ និងជនសង្ស័យបានចូលហ៊ុនគ្នាបើកខារ៉ាអូខេដែលមានឈ្មោះ JASSMINE បានរយៈប្រហែល០១ឆ្នាំ ហើយម្ចាស់ក្រុមហ៊ុនតែងតែឈ្លោះប្រកែកគ្នារឿងភាគហ៊ុន ដោយនៅថ្ងៃទី២៨ ខែកុម្ភៈ ឆ្នាំ២០២៤ វេលាម៉ោងប្រហែល១៨ និង៣០នាទី ជនរងគ្រោះនិងប្រពន្ធ បានទៅត្រួតពិនិត្យការងារនៅកន្លែងខារ៉ាអូខេ ហើយបានជួបជាមួយឈ្មោះគួយ ថាវី (ជនសង្ស័យ) កំពុងត្រួតពិនិត្យការងារ រហូតដល់វេលាម៉ោងប្រហែល០១និង០០នាទី យប់ចូលថ្ងៃទី២៨ ខែកុម្ភៈ ឆ្នាំ២០២៤ ជនរងគ្រោះបានទៅត្រួតពិនិត្យនៅខារ៉ាអូខេម្តងទៀត ហើយបានចូលទៅនិយាយការងារនៅបន្ទប់ ស្រាប់តែជនសង្ស័យដើរចូលមកតាមក្រោយ វាយជនរងគ្រោះចំនួន០១ដៃត្រូវចំសៀតផ្កាបណ្តាលឱ្យបាត់បង់ស្មារតី និងបន្តវាយជាច្រើនដៃទៀត ព្រមទាំងចាប់ក្បាលជនរងគ្រោះបោកទៅជញ្ជាំងបណ្តាលឱ្យសន្លប់ និង បានព្យាយាមរឹកកជនរងគ្រោះស្ទើតែបាត់បង់ជីវិត កុំតែប្រពន្ធជនរងគ្រោះចូលទៅឃើញទាន់ កុំអីអាចស្លាប់។ ក្រោយពីទទួលបានពាក្យបណ្តឹងកម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានចុះដល់កន្លែងកើតហេតុ តែរកជនសង្ស័យពុំឃើញ រហូតដល់វេលាម៉ោង១៤និង០០នាទី ថ្ងៃខែឆ្នាំដដែល ជនសង្ស័យបានចូលខ្លួនមកបំភ្លឺនៅមូលដ្ឋានកងរាជអាវុធហត្ថក្រុងប៉ោយប៉ែតថា ខ្លួនពិតជាបានប្រើហិង្សាទៅលើជនរងគ្រោះខាងលើតាមពាក្យបណ្ដឹងរបស់ជនរងគ្រោះពិតប្រាកដមែន។

 លោកវរសេនីយ៍ត្រី នួន នីណារ៉ូ បានឱ្យដឹងថា ក្រោយពីស្ដាប់ចម្លើយសារភាព លោកបានចាត់ឱ្យកម្លាំងជំនាញធ្វើកំណត់ហេតុឃាត់ ហើយកសាងសំណុំរឿងតាមនីតិវិធីបញ្ជូនមកបញ្ជាការដ្ឋានកងរាជអាវុធហត្ថខេត្តចាត់ការបន្ត។ 

     លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើសបានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពី ឯកឧត្តម កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ។ 

 បច្ចុប្បន្ន ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្ត បញ្ជូនទៅសាលាដំបូងខេត្តហើយ នៅរសៀលថ្ងៃព្រហស្បត៍ ទី២៩ ខែកុម្ភៈ ឆ្នាំ២០២៤នេះ ដើម្បីអនុវត្តតាមនីតិវិធី។ 

ចំពោះជនសង្ស័យខាងលើត្រូវបានគេដឹងថាធ្លាប់សមត្ថកិច្ចធ្វើឃាតខ្លួនម្តងហើយ ពាក់ព័ន្ធទៅ និង បើកកាស៉ីណូ និង ហ្គេមអនឡាញគ្មានច្បាប់។ ហើយករណីនេះ មិនដឹងថាតើជនសង្ស័យអាចនៅក្រៅសំណាញ់ច្បាប់បាន ឬ យ៉ាណានោះទេ៕